بسم الله الرحمن الرحيم
انا عايزه اتكلم معاكم النهاردة فى موضوع كدا عايزين نعتبرة نقاش
وحوار بشكل هادئ وصريح ومحترم عشان نوصل للى احنا عايزينة
لية البنات فى مواقف معينه بيخلعوا حجابهم ؟؟
يعنى البنت تكون محجبة واخر احترام ووقار واشطة وفله شمعه منوره
واول ما يكون فية فرح او مناسبة لحد من قريباتها او صحباتها تروح ضاربة
الفستان وخالعة راسها(الحجاب) وناطة فى ازازة الكلونية ورايحة عند
الكوافير يكويلها شعرها وتنام فى علبه الميك اب تديها بوهية بئى وتدرج
الالوان على وشها بئى احمر واخصر وبنفسجى بلياتشو يعنى
ولو يعنى متحشمين شوية تروح رامية القصة من تحت الاشرب كدا منزلها على قورتها
وبردة مدرجة الالوان ومستحمية بالكاااالونية
لية كدا بس ؟؟
المشكلة ان ساعات البنات مش بيكونوا عايزين يعملوا كدا بس امهاتهم نفسهم بتجربهم على كدا او على الاقل بتنصحهم بكدا
طبعا فية بنات مش بتعمل كدا خااااااااااااااااااااالص وانا مش بقول ان كل البنات بتعمل كدا
المهم دلوقتى لية الحجاب مجرد مظهر فى حياتنا
مجرد انه لو شعرك مش حلو تلبسى الحجاب
لو مكسلة تعملى شعرك كل يوم تلبسى الحجاب
لو المجتمع والاهل بيفرضوا عليكى دا بتلبسى الحجاب
لية ميكونش جزء اساسى من دينك اللى ربنا امرك بية
وتعملية من نفسك بدون او ضغوطات او اوامر من حد
الموضوع للنقاش
احب اشوف ردودكم