كل الحكاية يبقى معاكى مكرونة مسلوقة والبشاميل واللحمة المفرومة اللى مع البصل دى اللى هتحطيها جواها (على فكرة أنا بحبها بالفراخ)
المهم هنعمل إيه بالـ 3 حاجات دول ؟
بتجيبى صينية وتدهنيها سمنة طبعاً الأول بعد كده بتحطى نص كمية المكرونة وفوقيها اللحمة (أو الفراخ اللى أنا بحبها) بعد كده تحطى نص المكرونة التانى
ده كان الموضوع باختصار لكن إحنا عايزين نعمله باحترافية
علشان كده لازم نعرف البشاميل الأول بيتعمل إزاى واحدة واحدة
طريقة عمل البشاميل :- معلقتين سمنة تحمرى فيهم 4 معالق دقيق زى الشاطرة بعد كده تضيفى نص كيلو لبن وتقليب بقى والكلام ده الخليط ده هتسيبيه يبرد بعد كده تحطيله بيضتين وملح وفلفل وتقلبيه تانى وخلاص
عملنا البشاميل
انتى يا هانم يا اللى بتهزرى مع صاحبتك أيوة انتى يا اختى ركزى يا حبيبتى فى الدرس يمكن تنفعى بنات آخر زمن صحيح
نيجى لموضوعنا
بعد ما عملنا البشاميل هنسيبه فى أى حتة ونعمل المكرونة
طريقة عمل المكرونة :- هتجيبى مكرونة أقلام وتسلقيها عاااااااادى جداً بعد ما تسلقيها هتآخدى نص البشاميل وتقلبيها فيه (الخطوة دى مش كل الناس بتعملها بس اسمعوا الكلام ده أنا ياما أكلتها وكانت تحفة )
كده يا حلوين بقى معانا مكرونة متقلبة فى نص البشاميل ومعانا النص التانى من البشاميل فاضل إيه تاااااااااااااانى ؟ آه لازم نعمل العصاج بقى (اللى هو اللحمة المفرومة مع البصل يا اللى بتسألى) طبعاً يا هانم وانتى هتسمعى الأسامى دى فين شاطرة بس تلعبى ششششششششششش مش عايزه صوت
تجيبى بصلتين كبار وتقطعيهم وكده ونجيب نص كيلو لحمة مفرومة وتشوحيها مع البصل فى السمنة أكيد يعنى ومش عايزه واحدة تقوللى يعنى إيه تشوحيها وربنا باللى فى رجلى
عملنا العصاج ومعانا البشاميل ومعانا كمان المكرونة اللى قلبناها فى نص البشاميل دى
هاتولى بقى صينية هندهن الصينية سمنة الأول بعد كده نحط نص المكرونة وفوقيها العصاج وفوقيه نص المكرونة التانى استنوا رايحين فين لسة معانا نص البشاميل اللى ما عملناش بيه حاجة أهو النص ده هتحطوه ع الوش يا حلوين
كده قشطة أوى
مش فاضل غير خطوة واحدة ومهمة خالص (نسيت اسأل ماما هى مهمة ليه ) هندهن وش الصينية الجميلة اللى عملناها دى ببيضة غالباً علشان الوش يحمر ويبقى شكله حلو ما تخافوش ما بتبقاش زفرة ولا حاجة لالالالالا جربوا بس وقولولى
الرئيسية 
البوابة 
التسجيل 
دخول 
الأحد أكتوبر 20, 2013 11:10 am من طرف عبدالرؤوف
